Лорестан университеті, облыстағы ең ірі жоғары оқу орны

Лорестан облысы - Иранның таулы аймақтарының бірі болып саналады, оның шекараларында климаттық әртүрлілік айқын байқалады. Бұл облыстағы ең ірі білім беру мекемесі - «Лорестан университеті», мұнда шамамен 9 мың студент білім алады. Университеттің орталық кампусы облыс орталығы Хоррамабад қаласында орналасқан, ал тағы төрт филиалы облыс аудандарында жұмыс істейді.

Лорестан университетінің тарихы
Лорестан университеті тәуелсіз оқу орны ретінде 1993 жылы (1372 ж.х.) өз жұмысын бастағанымен, оның негізі 1964 жылы (1343 ж.х.) қаланған. Ол кезде Ахваз қаласындағы Жундишапур университетінің филиалы ретінде «Лорестан жоғары оқу орны» құрылып, алғаш рет 100 студент қабылданған. Алғашқы студенттер физика, химия, математика және биология салаларында бакалавр деңгейінде оқыды.

1979 жылғы Ислам революциясынан кейін бұл оқу орны өз жұмысын «Лорестан жоғары білім беру кешені» атауымен тәуелсіз түрде жалғастырды. Кейінірек Лорестан облысында кешенді университет құру жоспары ұсынылып, 1993 жылы бұл кешен толыққанды университет мәртебесін алды.

Лорестан университетінің білім беру және ғылыми-зерттеу жағдайы

Қазіргі таңда Лорестан университетінде 8 факультет бар:

1. Табиғи ресурстар факультеті – бұл факультетте «орман шаруашылығы», «жайылым және су ресурстарын басқару инженериясы», «балық шаруашылығы және қоршаған ортаны қорғау инженериясы» бағыттары бойынша үш білім беру тобы жұмыс істейді.

2. Әдебиет және гуманитарлық ғылымдар факультеті – мұнда шамамен екі мың студент білім алуда. 80-ге жуық штаттық оқытушы құрамында 12 білім беру тобы бар.

3. Ауыл шаруашылығы факультеті – бұл факультет университет мәртебесін алғаннан кейін бір жылдан соң құрылған. Онда ауыл шаруашылығы саласындағы білім мен ғылыми зерттеулерді жүргізу үшін 10 білім беру тобы жұмыс істейді.

4. Жаратылыстану ғылымдары факультеті – бұл факультетте бакалавриат бойынша 11, магистратура бойынша 24, докторантура бойынша 16 мамандық оқытылады. Мұнда 78 оқытушы қызмет етеді.

5. Техника және инженерия факультеті – 2003 жылы (1382 ж.х.) құрылған бұл факультетте 8 білім беру тобы жұмыс істейді.

8. Химия факультеті – бұл факультет алғаш рет 1977 жылы (1356 ж.х.) Лорестан жоғары білім беру орталығының төрт білім беру тобының бірі ретінде құрылған. Бірақ жаратылыстану ғылымдары факультетінен химия тобының бөлініп, жеке Химия факультеті ретінде құрылуы 2022 жылы жүзеге асқан. Қазіргі таңда факультетте 19 штаттық оқытушы жұмыс істейді.

Сондай-ақ, Лорестан университетінің филиалдары ретінде облыс аудандарында 4 жергілікті оқу орталығы ашылған:

• Коһдешт: Бұл орталықта «Математика және оның қолданбалары» мамандығы бойынша білім беріледі.
• Әлештер: Бұл тек қыздарға арналған орталықта шамамен 500 студент білім алады. Мұнда «Компьютер инженериясы», «Математика және оның қолданбалары», «Коммерциялық менеджмент», «Өнеркәсіптік менеджмент» және «География» мамандықтары бар.
• Пелдехтар: Бұл орталық 2012 жылы (1390 ж.х.) «Бағдарламалық жасақтама инженериясы» және ауылшаруашылық инженериясының «фитопатология» мен «бау-бақша ғылымы» салаларында оқытудан басталған. Қазіргі таңда бұл орталықта сондай-ақ ауылшаруашылық инженериясы, психология, бухгалтерлік есеп, ағылшын тілін оқыту және спорт ғылымдары бойынша да білім беріледі.

• Нурâбад: Бұл орталық тек ер балаларға арналған. Мұнда шамамен 220 студентке «Психология», «Мемлекеттік басқару» және «Бухгалтерлік есеп» мамандықтары бойынша білім ұсынылады.

Лорестан университетінің халықаралық қызметі
2023 жылы Лорестан университеті шамамен 200 шетелдік студентті қабылдады. Университет болашақта оқу және тұрмыстық жағдайларды жақсарту арқылы шетелдік студенттердің санын арттыруды жоспарлап отыр. Қазіргі уақытта университет жанында «Ғылыми және халықаралық ынтымақтастық» бөлімі жұмыс істейді. Бұл бөлім шетелдік оқу және ғылыми мекемелермен байланыс орнатып қана қоймай, сонымен қатар халықаралық қонақтар мен шетелдік профессорларды шақырып, кездесулер мен іс-шаралар ұйымдастырады.