Кездесуге «Целинный» директоры Джамиля Нуркалиева, көркемдік директор Алима Қайрат, продакшн-директор Адия Акпеисова, сондай-ақ Иран Мәдени орталығының басшысы Хұсейн Ағазаде қатысты.

«Целинный» – Қазақстан мен Орталық Азиядағы заманауи мәдениетті қолдауға бағытталған аймақтық орталық. Оның басты мақсаты – жергілікті интеллектуалдық және көркем қауымдастықты дамыту, өнер мен ғылым арасындағы диалогты күшейту. Орталық заманауи суретшілер мен зерттеушілерге арналған ашық пікірталас алаңы ретінде жұмыс істейді.

Кездесу орталық бойынша экскурсиядан басталды. Қонақтарға орталықтың тарихы мен бағыттары таныстырылып, кейін «Барсакелмес» көрмесімен де танысу мүмкіндігі берілді. Экскурсиядан соң тараптар бас қосып, өздерінің қызмет бағыттары мен жобалары туралы пікір алмасты. Әңгіме барысында болашақта ортақ мәдени және көркем жобаларды бірлесе жүзеге асыру мүмкіндігі де талқыланды.

Иран Мәдени орталығының басшысы Хұсейн Ағазаде Иранның бай мәдениеті мен терең тарихы жайлы айтып, осы мәдениетті Қазақстан жұртшылығына кеңінен таныстырудың маңыздылығын атап өтті. Осы мақсатта ирандық қолөнер бұйымдары мен каллиграфияға арналған көрме және шеберлік сабағын ұйымдастыру туралы ұсыныс айтылды.

Кездесу жылы және достық атмосферада өтті. Тараптар ортақ мәдени байланыстарды нығайтып, шығармашылық жобалар арқылы өзара ынтымақтастықты жалғастыруға ниет білдірді. Іс-шара соңында қатысушылар естелік суретке түсіп, алдағы кездесулерге үмітпен қоштасты.