19–21 қараша 2025 жыл аралығында Алматы қаласындағы «Атакент» көрме орталығында өткен XIII Қазақстандық халықаралық Кітап және полиграфия көрмесі мәдениет пен білім саласындағы маңызды ынтымақтастық алаңы болды. Осындай ауқымды шарада Иран Ислам Республикасының Бас консулдығы жанындағы Мәдени орталығы да қатысып, белсенді түрде жұмыс атқаруда.

Көрме күндері Мәдени орталық келушілерге парсы тілін үйрену мүмкіндіктері, Иранның жоғары оқу орындары, ондағы оқу бағдарламалары мен шетелдік студенттерге арналған гранттар жөнінде толыққанды ақпарат берді. Сонымен бірге Иранға саяхаттауды жоспарлап жүрген азаматтарға визалық талаптар, мәдени ерекшеліктер, тарихи ескерткіштер мен туристік бағыттар бойынша жеке кеңес жүргізілді.

Экспозицияда Иранның дәстүрлі қолөнер бұйымдары, парсы тілін оқытуға арналған оқулықтар, көркем және ғылыми бағыттағы ирандық кітаптар, Иран мәдениеті, әдебиеті мен тарихы жайлы түрлі постерлер қойылды. Бұл көрме бұрышы келушілерге Иран өркениетінің көркемдігін, қолөнерінің шеберлігін және рухани байлығын тереңірек тануға мүмкіндік берді.

Мәдени орталықтың негізгі мақсаты — Қазақстан Республикасы мен Иран Ислам Республикасы арасындағы мәдени, ғылыми және білім беру салаларындағы байланыстарды нығайту. Орталық екі елдің оқу орындары, шығармашылық ұйымдары мен ғылыми мекемелері арасындағы серіктестікті кеңейтуге, мәдени алмасу жобаларын іске асыруға және академиялық ұтқырлықты дамытуға ерекше көңіл бөледі.

Сонымен қатар Мәдени орталық қазақ және иран халықтары арасындағы достықты тереңдетіп, өзара түсіністік пен мәдени жақындасуға қызмет етеді. Осындай іс-шараларға қатысу екі ел арасындағы ынтымақтастықтың нығаюына және жаңа мәдени бастамалардың пайда болуына жол ашады.