2025 жылғы 15 қазан күні Фараби атындағы Қазақ ұлттық университетінде (ҚазҰУ) университет ректоры Жансейіт Түймебаев пен Алматы қаласындағы Иран Ислам Республикасының Бас консулы Суна Ахмади, сондай-ақ Иран Мәдени орталығының басшысы Хұсейн Ағазаде арасында ресми кездесу өтті.

Кездесу университет музейін аралаудан басталды. Қонақтар ҚазҰУ тарихымен танысып, білім ордасының жетістіктерін көрді. Суна Ахмади ханым университеттің Құрмет кітапшасына өз тілегін жазып қалдырды.

Музеймен танысудан кейін өткен ресми кездесуде Жансейіт Түймебаев қонақтарға жылы лебіз білдіріп, ҚазҰУ-дың қазіргі жетістіктеріне тоқталды. Оның айтуынша, университет QS рейтингі бойынша Қазақстанда бірінші, ТМД елдері ішінде екінші, ал әлемдік рейтингте 166-орында тұр. Ректор ҚазҰУ мен Иран арасындағы ынтымақтастық жақсы деңгейде екенін атап өтті. Университеттің шетелдік жоғары оқу орындарымен тығыз байланысы бар: бүгінде Қытай және Мәскеу ядролық университеттерінің филиалдары ҚазҰУ базасында жұмыс істейді. Және ҚазҰУ филиалдары басқа елдерде де бар екенін айтты. Сондай-ақ университетте 7000-ға жуық шетелдік студент білім алады, олардың 15-і Ираннан келген. Университет қабырғасында жұмыс істейтін Ирантану орталығының басты мақсаты – екі ел арасындағы ғылыми және мәдени байланыстарды тереңдету.

Өз кезегінде Суна Ахмади ханым екіжақты кездесуге қуанышты екенін білдіріп, ұлы ойшыл Әбу Насыр әл-Фарабидің екі елге де ортақ тұлға екенін ерекше атап өтті. Университеттің сол ғұламаның есімімен аталғаны зор мәртебе екенін айтты. Сонымен қатар ол ынтымақтастықтың жаңа бағыттарын ұсынды:

1. Ғылыми зерттеу, ақпараттық технологиялар, жасанды интеллект, нанотехнология, наномедицина, химия, математика және физика салаларында бірлескен жобалар жүргізу;
2. Университеттер арасындағы ғылыми алмасу бағдарламаларын дамыту – оқытушылар, докторанттар, магистранттар мен студенттерді зерттеу жұмыстарын жүргізу үшін өзара тәжірибе алмасуға жіберу.

Суна Ахмади қазіргі таңда бұл бағыттағы жұмыстар басталып кеткенін және алдағы уақытта ынтымақтастықты одан әрі кеңейту қажет екенін айтты. Ол сондай-ақ Алламе Табатабаи университетінің проректоры Мандана Тишеяр ханыммен келісілген «Наурыз» журналының шығуға дайындалып жатқанын хабарлады. Бұл жобаға Қазақстан тарапынан Мейірбаев Бекжан мырза бастаған ғылыми топ қатысып отыр. Болашақта екі ел ғалымдарының Наурыз мерекесіне арналған мақалаларды өзара аударып жариялауы маңызды бастама болатынын айтты. Сонымен қатар Иран Мәдени орталығы ҚазҰУ-дың 11 оқытушысы мен 1 докторантын Иранға жіберу бағытында жұмыс істеп жатқанын жеткізді.

Жансейіт Түймебаев өз сөзінде университетте Иранның тарихы пен әдебиеті саласында терең зерттеу жүргізіп жүрген ғалымдар бар екенін атап өтті. Ол Ағазаде мырзаның бұл бағыттағы жұмыстармен жақсы таныс екенін айтып, ұлы Абайдың да парсы шайырлары жайлы еңбектер жазғанын еске салды. Қазақстанда XIX ғасырға дейінгі Иран тарихы зерттелгенін, енді қазіргі заманғы Иранды зерттеу қажеттігін айтты. Сондай-ақ, Ираннан профессорларды шақырып, ҚазҰУ студенттеріне дәріс өткізу, ал қазақстандық ғалымдарды Иран архивтерінде зерттеу жүргізуге жіберу жөнінде ұсыныс білдірді. Университет ректоры екі ел ғалымдары қатысатын ортақ конференция ұйымдастыру идеясын да ұсынды.

Кездесу достық және өзара құрмет атмосферасында өтті. Тараптар екі ел арасындағы мәдени, ғылыми және білім беру байланыстарын дамытуға ниетті екендерін білдіріп, жылы лебіздермен аяқтады.