2025 жылдың 13 қазан күні Қазақ ұлттық қыздар педагогикалық университетінде Алматы қаласындағы Иран Ислам Республикасының Бас консулдығы өкілдерімен кездесу өтті.

Кездесуді университет ректорының міндетін атқарушы Сәбит Сұңғатай ашып, Суна Ахмади ханымды консулдық қызметінің басталуымен құттықтады. Ол өз сөзінде екі ел арасындағы мәдени және ғылыми байланысты дамытудың маңыздылығын атап өтіп, болашақта осы бағытта тығыз ынтымақтастық орнатуға ниетті екенін айтты. Сондай-ақ, қазіргі уақытта университет магистратурасында 26 студент парсы тілін оқып жатқанын, келешекте парсы тілін үш деңгейде – бакалавриат, магистратура және докторантурада – оқыту жоспарланып отырғанын жеткізді.

Суна Ахмади ханым өз сөзінде Қазақстан мен Иран арасындағы достық байланыстарды нығайтуға үлкен мән берілетінін атап өтті. Ол студенттер мен оқытушылар алмасуы, тағылымдамалар, оқу курстары мен семинарлар өткізу, ғылыми жобалар мен мақалалар алмасу бағыттарында бірлесіп жұмыс істеу қажеттігін айтты. Бұл бағдарламалар Алматыдағы Иран Мәдени орталығы арқылы жүзеге асырылатынын да атап өтті.

Одан кейін сөз алған Халықаралық ынтымақтастық бөлімінің басшысы Салтанат Джакубаева қонақтарды жылы қарсы алып, өзі де кезінде парсы тілін оқығанын айтып өтті. Ол парсы тілін дамыту бастамаларын қолдайтынын және қазіргі таңда Қазақстан бойынша тек үш университетте ғана бұл тіл оқытылатынын жеткізді. Солардың бірі – Қазақ ұлттық қыздар педагогикалық университеті. Салтанат ханым парсы тілін сапалы оқыту үшін тіл үйретуші, яғни ирандық профессорды тарту қажеттігін атап өтті. Сонымен қатар, университеттің IT саласы бойынша да ынтымақтастық орнатуға дайын екенін, осы бағытта бір ирандық жоғары оқу орнымен меморандум жасасуға ниетті екенін айтты.

Кездесу барысында Ағазаде Хоссейн мырза да сөз алып, осындай шараға қатысқанына ризашылығын білдіріп, барлық ұсыныстарды қолдайтынын және ынтымақтастыққа дайын екенін жеткізді. Университет тарапынан Иран мәдени орталығын ашу туралы ұсыныс айтылды.

Кездесуден кейін қонақтарға университет аумағында экскурсия ұйымдастырылды. Делегация мүшелері «Ақтұмар» музейін және студенттердің туындылары қойылған сурет галереясын тамашалады. Іс-шара жылы әрі достық көңіл-күйде өтіп, екіжақты ынтымақтастықты дамытуға серпін берді.