2025 жылдың 21 қараша күні ALT университетінде Иран делегациясының ресми кездесуі өтті. Бұл кездесу екі жақтың халықаралық әріптестікті нығайтуға деген ортақ мүддесін айқындаған маңызды диалог алаңы болды.

Кездесуге қатысушылар

АЛТ университеті тарапынан:

• Сергазин Ғани Құдайбергенұлы — ғылым және халықаралық ынтымақтастық жөніндегі проректор, Басқарма мүшесі;
• Калибеков Аслан Сеиткулович — ректордың кеңесшісі;
• Жанна Алматовна — халықаралық департамент директорының міндетін атқарушы;
• Мұстафа Ақмарал Берікқызы — шетелдік студенттерді рекрутингтеу офисінің жетекшісі.

Иран делегациясы құрамында:

• Асгар Мохаджери — Ислам Азад университетінің профессоры, ирандық абитуриенттерді шетел университеттеріне жіберетін ұйымның негізін қалаушы және бас хатшысы;
• Агазаде Хоссейн — Иранның Алматыдағы Бас консулдығы жанындағы мәдениет орталығының директоры;
• Досмұрат Нұрәділ — ресми аудармашы;
• Сара Соһраби — «АрманСанджеш» компаниясының директоры.

Кездесу қонақтарды жылы қарсы алуынан басталды. Университет басшылығы оқу орнының тарихын, негізгі стратегиялық бағыттарын және халықаралық серіктестік саласында жүзеге асып жатқан жобаларын таныстырды. Әсіресе ALT-тың заманауи IT-инфрақұрылымы, академиялық мобильдік бойынша тәжірибесі және шетелдік студенттерді қолдау жүйесі делегацияның ерекше қызығушылығын тудырды.

Иран тарапы өз кезегінде Ирандағы жоғары білім жүйесінің ерекшеліктерімен таныстырып, әсіресе техникалық мамандықтарға деген сұраныстың артып келе жатқанын атап өтті. Асгар Мохаджери өзінің ұйымы арқылы жыл сайын мыңдаған ирандық талапкерлерді шетелдік университеттерге бағыттайтынын айтып, Қазақстанды Иран студенттері үшін тартымды бағыттардың бірі ретінде бағалады.

Кездесуде бірнеше маңызды бағытты қамтыған конструктивті әңгіме өрбіді:

1. Студенттер алмасу бағдарламаларыТараптар бакалавриат, магистратура және докторантура деңгейлерінде академиялық мобильдікті дамытуға мүдделі екендерін білдірді. Иран студенттерінің Қазақстанда оқуын жеңілдету үшін қабылдау процесін оңтайландыру талқыланды.
2. Бірлескен ғылыми жобалар және зерттеулерЖасанды интеллект, ақпараттық технологиялар, инженерия және цифрлық трансформация салалары екі оқу орны үшін де басым бағыттар қатарында екені айтылды. Бірлескен стартаптар мен зерттеу орталықтарын ашу мүмкіндігі де сөз болды.
3. Меморандумға қол қою мәселесіЫнтымақтастықты институционалды негізде бекіту үшін жақын уақытта арнайы меморандумға қол қою қажеттілігі талқыланды. Бұл құжат болашақ жұмыстың нақты қадамдарын айқындайтын болады.
4. Логистика және көлік саласындағы серіктестікҚазақстан мен Иран арасын байланыстыратын Каспий теңізінің стратегиялық маңызы атап өтілді. Бұл бағытта да ғылыми зерттеулер мен сараптамалық жобалар ұйымдастыру әлеуеті бар екені айтылды.

Кездесу достық және өзара түсіністік атмосферасында өтті. Тараптар ынтымақтастықты тереңдетуге ниет білдіріп, жақын уақытта нақты іс-шаралар жоспарын әзірлеуге келісті. Делегация ALT университетінің ашықтығына, халықаралық серіктестікке деген ұмтылысына оң баға берді.

Бұл шара екі ел арасындағы білім саласындағы көпірді нығайтып, жаңа мүмкіндіктердің бастамасына айналды.