2025 жылдың 26 ақпанында әл-Фараби атындағы Қазақ ұлттық университетінің (ҚазҰУ) Шығыстану факультетінде Қазақстан Республикасындағы жалпы білім беретін мектептер мен гимназиялардың жоғары сынып оқушылары және колледж студенттеріне кәсіби бағдар беру мақсатында «Ашық есік күні» өтті.

Жиынға Шығыстану факультетінің деканы Наталья Борисовна Ем, Иран Ислам Республикасының Алматы қаласындағы Бас консулдығы жанындағы Мәдени өкілдіктің басшысы Хоссейн Ағазаде, Үндістан Республикасының Свами Вивекананда мәдени орталығының директоры Санджай Веди, сондай-ақ кафедра меңгерушілері, оқытушылар, профессорлар, студенттер мен мектеп оқушылары және колледж студенттері қатысты.

Іс-шара барысында оқушылар әр кабинетке кіріп, факультетте оқытылатын шығыс тілдері мен шығыс елдерінің мәдениетімен қысқаша танысты. Ирантану кабинеті арнайы ұйымдастырылып, Иран мәдениетін тереңірек таныстыру мақсатында ирандық қолөнер бұйымдары мен кітаптар көрмесі өтті. Сонымен қатар, Иран мәдени өкілдігінің қолдауымен, қатысушыларға 100 дана ирандық «SunIch» сусыны таратылды. Оқушыларға арнайы ақпараттық флаерлер де үлестірілді.

Бұдан кейін қатысушылар акт залына жиналып, арнайы дайындалған мәдени бағдарламаға қатысты. Факультет студенттері ән айтып, би билеп, өлең оқып, өз өнерлерін көрсетті. Парсы тілі бөлімінің студенті Рахат Адилов парсы тілінде әйгілі «Джан-е Мариам» әнін орындады.

Өз кезегінде Иран Ислам Республикасының Алматы қаласындағы Бас консулдығы жанындағы Мәдени атташесі Хоссейн Ағазаде сөз сөйлеп, оқушыларды парсы тілін үйренуге шақырды. Ол университет түлектерінің еңбек нарығындағы жетістіктері туралы баяндап, оқушыларға болашақта үлкен мүмкіндіктерге ие болуға болатынын жеткізді. Сонымен қатар, факультет деканы мен парсы тілі оқытушыларына алғыс хаттар мен естелік суреттер табыс етті.

Іс-шара соңында оқушылардың қызығушылығын арттыру мақсатында Иран мәдениеті жайлы викторина ұйымдастырылды. Дұрыс жауап берген қатысушыларға сыйлық ретінде «Бір беттік кітап» ұсынылды. Бұл кітапты қазақ тіліне аударған – осы факультеттің студенті Гауһар Омарханова екені де ерекше атап өтілді.

«Ашық есік күні» шарасы оқушылар мен студенттерге үлкен әсер қалдырып, олардың Шығыстану факультетіне деген қызығушылығын арттырды.