Қазақстан елордасы Нұр-Сұлтан қаласында ағымдағы жылдың 20-24 сәуір аралығында "Фолиант" баспасы ұйымдастырған Eurasian Book Fair-2022 V Еуразия халықаралық кітап көрме-жәрмеңкесі өтті.

Көрменің ашылу салтанатында ҚР Мәдениет және спорт министрлігінің Архив және құжаттарды басқару комитетінің басшысы Қуат Борашев және Қазақстанның Жазушылар одағының басшысы Ұлықбек Есдәулет сөз өйлеп, қатысушылар мен жиналған қауымды көрме жұмысының басталуымен құттықтады.

Көрме-жәрмеңкенің негізгі мақсаты - кітап оқуды насихаттау, оқырман мәдениетін қалыптастыру, әлеуетті оқырмандар мен сатып алушыларға жетекші баспалардың кітап өнімдерінің заманауи ассортиментін, кітап шығару және полиграфия саласындағы жаңа технологияларды ұсыну, әлемдік кітап шығару және баспа индустриясының тәжірибесін зерделеу.

Қазақстан астанасында бесінші рет өтіп жатқан көрмеге Иран, Ресей, Түркия, Испания және Қытай елдері қатысты. «Еуразия 2022» кітап көрмесіне алыс-жақыннан 80-нен астам баспа үйлері, кітап дүкендері, ғылыми-білім беру ұйымдары мен полиграфиялық компаниялар қатысты. Көрмеде 100-ден астам мәдени іс-шаралар мен жаңа кітаптардың тұсаукесері өтті. Шара барысында жазушылармен, өнер қайраткерлерімен, баспалармен кездесулер өткізілді.

Осы көрменің тұрақты қатысушысы болып табылатын Иранның мәдени өкілдігінің стенді, иран әдебиетінің ұлы туындылары және оның қазақ, орыс және ағылшын тілдеріне аудармалары, иран тарихы, мәдениеті мен өнерімен таныстыратын еңбектер, парсы тілі мен ирантану оқулықтары, қазіргі дәуіргі авторлар шығармаларының аудармалары, ирандық қолөнер бұйымдары көрмеге қойылып, қазақстандықтардың ыстық ықыласына бөленді.