Астанада 17–18 қыркүйек күндері өткен Әлемдік және дәстүрлі діндер лидерлерінің VIII съезі аясында «Сандық шындық пен жасанды интеллект дәуіріндегі рухани құндылықтар» тақырыбындағы үшінші секциялық отырысы Иран Ислам Республикасының Діндер және мәдениеттер диалогы орталығының директоры Әли Акбар Зияидің басшылығымен өтті .

Отырыста заманауи технологиялардың рухани өмірге ықпалы, діни көшбасшылардың қоғамдағы жауапкершілігі және жасанды интеллектті этикалық тұрғыдан қолдану мәселелері талқыланды. Зияи мырза өз баяндамасында дінаралық үнқатысудың болашағына тоқталып, дәстүрлі рухани құндылықтар мен цифрлық дәуір талаптарының үйлесімділігін сақтаудың маңызын атап өтті.

Секция жұмысына Солтүстік Македонияның қоғам қайраткері Георге Иванов, Эстония лютеран шіркеуінің архиепископы Урмас Виилма, Жапония, Испания және Үндістаннан келген дін және мәдениет өкілдері қатысты. Олар жасанды интеллекттің адамзатқа әкелетін мүмкіндіктері мен қауіп-қатерлері жөнінде ой бөлісті.

Кездесуде рухани көшбасшылардың цифрлық дәуірдегі миссиясы, жасанды интеллект этикасы және діни толеранттылықты ілгерілету жолдары талқыланды.