Әлемдік және дәстүрлі діндер лидерлері съезі хатшылығының жиырма үшінші отырысы 15 қыркүйек күні Астана қаласының Бейбітшілік және келісім сарайында өтті. Іс-шара ҚР Парламенті Сенаты төрағасы әрі хатшылықтың төрағасы Мәулен Әшімбаевтың құттықтау сөзімен ашылды. Ол съездің соңғы жиырма жылдан астам уақыт бойы жаһандық дінаралық диалогты нығайтуға, бейбітшілік пен өзара құрмет мәдениетін дамытуға үлес қосып келе жатқанын атап өтті.

Отырыс барысында халықаралық қатысушылар әлемдегі шиеленістерді еңсеру, діни және мәдени мұраны қорғау, жастардың дінаралық үнқатысудағы рөлі сияқты маңызды тақырыптарды талқылады. Сондай-ақ «2025 жылғы бейбітшілік үшін Астана декларациясы» қабылданды.

Жиынға 20-дан астам елден 30-дан аса діни жетекшілер мен халықаралық ұйымдардың басшылары қатысты. Қазақстанмен қатар, Иран, Әзірбайжан, Ватикан, Үндістан, Қытай, Сауд Арабиясы, Ресей және басқа да мемлекеттердің өкілдері сөз сөйледі.

Иран тарапынан Мәдениет және исламдық байланыстар ұйымының Діндер мен мәдениеттер диалогы орталығының төрағасы доктор Әли Акбар Зияи және аталған орталықтың христиандық бағыт бойынша жетекшісі доктор Захра Рашидбейги отырысқа қатысып, пікір білдірді.

Қатысушылар Съезд хатшылығының «ізгі ниет елшілері» институтының дінаралық татулық пен бейбітшілік құндылықтарын ілгерілетудегі маңыздылығын ерекше атап өтті.