Әлемдік және дәстүрлі діндер лидерлерінің VIII съезі аясында Иран Ислам Республикасының Мәдениет және исламдық байланыстар ұйымының басшысы Мұхаммад Мәһди Иманипур Қазақстан Республикасының Мәдениет және ақпарат министрі Аида Балаевамен кездесті.

Кездесуде тараптар мәдени-гуманитарлық қарым-қатынастарды нығайту, ортақ жобаларды жүзеге асыру және ақпараттық саладағы ынтымақтастықты дамыту мәселелерін талқылады. Министр Аида Балаева Иманипур мырзаны Президент Қасым-Жомарт Тоқаевтың қолынан «Шапағат» медалін алуымен құттықтап, Қазақстанның Иранмен мәдени әріптестікті кеңейтуге мүдделі екенін айтты.

Өз кезегінде, Иманипур Қазақстанның халықаралық деңгейдегі бастамаларына жоғары баға беріп, дінаралық диалог пен мәдени алмасуды одан әрі дамытуға дайын екенін жеткізді. Сонымен бірге, тарихи-мәдени ескерткіштерді бірлесіп қайта қалпына келтіру, сондай-ақ Қазақстанда Иран мәдениет апталығын өткізу мүмкіндігі қарастырылды.

Кездесуге Қазақстан тарапынан Мәдениет және ақпарат министрлігінің жетекші өкілдері қатысты. Тараптар өзара сый-сияпаттар алмасып, алдағы уақытта нақты жобаларды бірлесіп іске асыруға уағдаласты.